دورة حياة المندوب

اثني عشرة مشهد

المشهد الأول:

•اعلان في الجرنال مطلوب لشركة أدويه جامده طحن مندوبين دعايه بالمواصفات التاليه انثوسياستيك , أكتيف , فظيع , و حاجات تانيه كتير الشركات نفسها متعرفش معناها بس كلوا “كوبي و باست ” و خلاص.

المشهد الثاني:

•صديقنا ” الهلالي سمير” خريج جديد قرأ الاعلان قال لما ابعت السي في بتاعي, و بعته فعلا

المشهد الثالث:

•”نمساوي” السوبرفيزور في الشركه اتصل ب “الهلالي سمير” و حدد معاه موعد بكره الساعه 12 الظهر. •

و الهلالي داخل لقى واحد مجنون واقف قدام الشركه و قال للهلالي “دول كلهم زباين دول كلهم زباين”, الهلالي بص ليه و مفهمش. •

الساعه 12 الا خمسه الهلالي كان موجود في الشركه و اتلطع لغاية الساعه 7 المغرب لما دخل المقابله كل الوقت ده بسبب مسابقة البلاي ستيشن اللي كانت بين البرودكت مانيجرز.

المشهد الرابع:

•”نمساوي” خلص المقابله مع “الهلالي سمير” و دخل على الجي أم و دار بينهم الحوار التالي:

•نمساوي و هو مبتسم: لقيته يا فندم لقيته !

•الجي أم: هو ايه اللي لقيته يا نمساوي؟

•نمساوي: لقيت الولد اللي بندور عليه من زمان

•الجي أم: أخيرا, طمني

•نمساوي: اسمه “الهلالي سمير” ولد رائع بيقوللي انه كان بينط السور على “أكتاف زمايله” و كان بيسرق ساندوتشاتهم و كان ”بيضرب“ الواجب و حاجات كتييير يا فندم.

•الجي ام: يييييس! اتصل بيه علطول و قوله ان هو معانا.

المشهد الخامس:

•نمساوي اتصل بالهلالي سمير و بلغه ان انت الفتره الجايه حتكون معانا, الهلالي فرح و راح تاني يوم الشركه.

المشهد السادس:

•الهلالي استلم منطقته و دكاترته و من اول يوم مقضيها تفليص و ضرب اكبنسات و وعودات اونطه مع الدكاتره  وحرق بضاعه و بيع عينات و الخ الخ…

المشهد السابع:

•في يوم نمساوي اتصل بيه وقاله احنا عايزينك في المكتب النهارده!

•الهلالي سمير قلبه وقع في رجله و قال بس حتلاقيه قفش عليا البلاوي اللي بعملها , أكيد النمساوي زار الدكتور متولي شفيق و عرف ان بقالي 6 شهور بضرب الزياره و أكيد خد باله ان الاكسبنسات الشهر اللي فات ملعوب فيها و أكيد الواد “عبده مخازن” اشتكاه عشان فرق البونص ,,,  انا ضعت خلاص أنا ضعت خلاص…

المشهد الثامن:

•الهلالي دخل المكتب لقى النمساوي و الجي أم مبتسمين من الودن للودن , و قالوله:

•يا هلالي بعد الفتره الرائعه اللي فاتت اللي اثبت فيها الأكتيفيتي و البروداكتيفيتي و البروبلم سولفنج العالي قررنا ان احنا نرقيك سوبر فيزور المنطقه.

•الهلالي افتكر الجمله اللي الراجل قلهاله أول يوم “دول كلهم زباين دول كلهم زباين” و فهمها!

•الجي أم ربت على كتف الهلالي و قاله “بص يا هلالي المندوب ده زي العصير أبو شاليموه عايزك تمصمصه على الأخر و بعدين ترميه في أول زباله”

المشهد التاسع:

•دخل ابن امبارح الهلالي سمير على المندوبين أول يوم و قالهم:

•أوعوا حد يفلص و لا يضرب أكسبنس ولا يوعد دكتور أونطه و لا يحرق بضاعه , الشركه دي طاهره و تفضل طول عمرها طاهره (يا أمو المطاهر رشي الملح سبع مرات)

المشهد العاشر:

•بنفس طريقة الهلالي سمير المعروفه أترقى بقه سيلز مانيجر بعد ما طير نمساوي اللي فوقيه و بعدين بقه الجي أم بعد ما فرتك سمعة اللي كام موجود و طلع عليه البلاوي كلها و بعديييين؟

المشهد الحادي عشر:

•و بعدين دخل واحد جديد الشركه اسمه “المستكاوي أمير” و الباقي انته عارفينه.

المشهد الثاني عشر و الأخير:

•الهلالي سمير اتطرد بره الشركه بسبب “المستكاوي أمير” اللي بقه الجي أم •

و هو خارج بره لقى راجل شبه الراجل المجنون اللي شافه زمان , قرب منه و بص في عينيه لقاه “النمساوي”

•و يستمر المسلسل بلا عبر و لا نهايه …..