تعقيبا علي الجمعية العمومية العادية … فعلا مكانتش عادية
النهاردة 15 يوليو 2011
اول جمعية عمومية للمجلس ال”جديد” و كان المفروض فيه 3 نقاط اساسية علي جدول اعمال الجمعية
اولها اعلان نتيجة الانتخابات … و قد تم بحمد الله
مناقشة ميزانية النقابة … و هحكيلكم الموضوع باستفاضة
حاجة ثالثة ناس كتير نسيتها و هي انه كان فيه جمعية عمومية غير عادية يوم 18 يونيو و تم “تأجيلها” حسب وصف مجلس النقابة القديم الي يوم 15 يوليو و اللي كان المفروض هناقش فيها مشاكل الصيادلة و بالذات الحكوميين
و طبعا الموضوع لم يناقش و ده يثبت الرأي القائل انه تم الغاء و ليس تأجيل هذه الجمعية …. ولا عزاء للصيادلة
بالنسبة للميزانية … ملخص الموضوع ان مجلس النقابة “القديم” طلب مننا كأعضاء الجمعية العمومية اقرار ميزانية عامي 2009 و 2010
بالنسبة لعام 2009
مندوب الجهاز المركزي للمحاسبات ابدي ملاحظات تتعلق بالميزانية و المفروض ان مجلس النقابة كان يوفق اوضاعه و يصلح الاخطاء
و هذا ما لم يحدث
ذكر مثلا انه تم شراء بعض المعدات بالامر المباشر
و انه هناك مبلغ 150 الف جنيه تقريبا في صندوق النقابة مستحقة الرد للصيادلة في مشروع معرض السيارات
انه تم صرف ما يقرب من 55 الف جنيه لموظفي النقابة بدون وجه حق و انه هناك عدم متابعة لمواعيد الحضور و الانصراف
و انه لم يتم تطبيق قانون اتحاد نقابات المهن الطبية نحو الاعضاء الغير ملتزمين بسداد الاشتراكات
و ان النقابة عليها مديونيات لاتحاد نقابات المهن الطبية لم تسدد
” ده حسب ما اذكر “
ده غير ان السادة الحضور بالجمعية العمومية لم يكن معروضا عليهم اي تفاصيل تخص ميزانية 2009 …. يبقي يقروها علي اساس ايه ؟؟!!!
ملحوظة : في الاخر قالولنا اصلا ميزانية 2009 تم اقرارها العام الماضي … طيب يبقي مطلوب مننا ايه …
اللي فاهم حاجة يبقي يفهمني :))
اما بالنسبة لميزانية 2010 – يعني حتي نهاية عام 2010
لم يتم تقديم الميزانية الي الجهاز المركزي للمحاسبات سوي يوم 13 يوليو 2011
يعني من يومين … و بالتالي الجهاز المركزي لم يتمكن من اعداد تقرير بالملاحظات
يبقي نقر الميزانية ازاي ؟؟؟
————————————————————————————————————————————————
بعد اعلان نتيجة انتخابات النقابة بدأ خطاب الامين العام السابق و امين الصندوق السابق و بعده تعقيب الجهاز المركزي و الي فهمنا منه الجزئية اللي شرحتها فوق دي
المهم اننا اكتشفنا اكتشاف خطير النهارده
ان التسقيف هو من احد اهم وسائل التصويت الديموقراطي
فاكرين مجلس الشعب و الناس اللي بتسقف و خلاص و الريس اللي يقولك موافقة اجماع رفعت الجلسة ؟؟
اهو حاجة شبه كده يعني
بسم الله ما شاء الله ناس خبرة و كفاءة في التصفيق الحار
بيسقفوا علي اقرار الميزانية بالوصف اللي وصفته لحضراتكم ده
و النقيب ال”جديد” راح ختم الجمعية و قايم ماشي علي اساس ان التصفيق ده موافقة و اجماع و رفعت الجلسة
الموضوع تم بسرعة عجيبة
قبل مناقشة موضوع الميزانية زي ما قالولنا
و احد الزملاء د.جمال عبد الفتاح – حاول يطلع يتكلم بصفته عضو جمعية عمومية … عادي يعني … حقه ايه المشكلة
فما كان من احد اعضاء مجلس الشعب … قصدي النقابة الجدد الا انه منعه و دفعه و اسقطه ارضا
و طبعا فريق المصفقين بيشجع و واحد او اتنين بيساعدوه علي منع هذا الشخص الذي تجرأ و فكر يطلع يتكلم
الصراحة انا كنت مقرر اني اروح مستمع و مكنتش ناوي اتكلم علشان ميقولوش عليه ” بيزايد علينا ” مع اني بحب اللعبة بتاع المزايده دي جدا
لكن الموضوع نرفزني جدا و بمجرد وصول د.جمال الي المنصة صاح المهللون المصفقون … انزل انزل
شيء مخزي بجد
المهم النقيب ال”جديد” اعلن اعادة فتح الجمعية و مناقشة الميزانية ” اللي كان اقرها و مشي ” ما علينا
فريق المسقفتية ده فرسني بصراحة بيقولولنا انتوا كم واحد يعني
اقوله يا سيدي و هو فين التصويت اللي تم
يقولي التسقيف
يا سلام
حكم والله
المهم طلع بعض الزملاء و اتكلموا
كلام متزن يصف في النقطتين اللي شرحتهم بخصوص الميزانية
و عمنا النقيب الجديد بتاع الاقصر و غيره طالع يقول ان المعارضين دول هما المرشحين اللي سقطوا في الانتخابات !!! كلام هرتلة غير مسئول
هو اي معارض يبقي فلول و وطني و حاقد و بيزايد !!!
د.عبد الجواد اعلن انتهاء ائتلاف صيادلة مصر …و اننا كلنا ” بيتكلم عن مجلس النقابة ” كلنا واحد ” علما بأن مجلس النقابة ال”جديد” هو الائتلاف تقريبا لكن ما علينا و متشغلوش بالكم بالموضوع ده
و لكن اعضاؤه مصرين علي تقسيم الصيادلة الي ائتلاف … و فلول
خلاصة الكلام اللي فات انه لم يتم اقرار الميزانية
و ده بسبب حضور الصيادلة الفلول
و من هنا
ادعو كل الفلول من الصيادلة الي حضور كل الجمعيات العمومية و التعبير عن رايهم بحرية و ديموقراطية
بس يبيقو يعملوا حسابهم و يجيبوا بلطجية معاهم علشان يحموهم لو حد ضربهم
و يدربوا ايديهم علي التصفيق الحار و الحاد و يشربوا ينسون كتير …. علشان الصوت العالي بينفع
ملحوظة : عارف ان كلامي ده هيزعل ناس مني … بس ده انطباع كتير من الحضور اللي حضروا معانا من الفلول اللي زينا