معلومات مبسطة عن التغذية للأطفال خلال السنة الاولى من عمرهم

النهاردة ان شاء الله , حنناقش شوية معلومات مهمة برغم بساطتها , بخصوص تغذية الأطفال فى السنة الأولى ..

#قبل_الشهر_السادس , يفضل إن لبن الأم بس هو اللى يكون الغذا الوحيد للطفل .. و مفيش مشكلة من بعض طاردات الغازات أو المشروبات الدافية المشهورة , بشكل شبه يومى , عشان نتجنب المغص و مشاكل الهضم المعروفة فى السن ده .. زى الكراوية و الينسون (بدون تحلية بالسكر طبعا) ..

التشجيع على #التجشؤ (أو التكريع) , مهم جدا بعد كل رضاعة , عشان نتجنب تراكم فقاقيع الهوا فى المعدة , و بعد كده فى الأمعاء , و ده ممكن يسبب انتفاخات برضه و آلام مستمرة عند الطفل , و بيتم الكلام ده بالطبطبة (بالراحة) , على ظهر الطفل لحد ما نسمع صوت خروج الهوا من بقه .. بيكون صوت لذيذ قوى على قلب الأم  ^_^ ..

#السيريلاك , بيكون مسموح بيه , بعد انتهاء الشهر السادس .. و يفضل إننا نبدأ بالسريلاك بالقمح (السادة) , لمدة أسبوع أو 10 أيام , لحد ما البيبى يعتاد طعمه .. و بعد كده نبقى نغيّر له النوع كل فترة , عشان نديه الاحتياجات اللازمة له فى الأكل .. يعنى ممكن سريلاك بالفواكه أو الخضروات , و نبدّل بينهم , على حسب رغبته و تقبله ..

ممكن نحضّر السيريلاك بـ #لبن_الأم , أو باللبن الصناعى , عشان فايدته تزيد ..

يفضل إن اللى باقى من كل وجبة #يترمى , بعد ما الطفل يشبع تماما , و ما يتمش تقديمه له مرة تانية , عشان نتجنب نمو البكتيريا جواه , حتى لو اتحفظ فى التلاجة .. بجانب إن العلبة كلها يفضل إنها تستخدم خلال أول 4 أسابيع من فتحها ..

السيريلاك لا يغنى عن الرضاعة نهائيا , و لكن بيحل محل بعض مرات الرضاعة على مدار اليوم .. فما حدش يفتكر إنه كده بقى كافى بالنسبة للطفل ..

السيريلاك #بالعسل , ممنوع على الأطفال إلا بعد إتمام سنة , عشان ممكن يكون تقيل ع المعدة شوية ..

#قوام_السريلاك المفروض إنه يكون مناسب لإطعامه بالمعلقة .. مش بالببرونة .. يعنى يكون متوسط القوام , و ماسك نفسه , و فى نفس الوقت مش ناشف قوى .. و لازم يتم تحضيره بماء سبق غليه , عشان نوصل لدرجة تعقيم مناسبة للمية , و نتجنب الميكروبات الموجودة فيها ..

فى بعض الأحيان , ممكن تلجأ الأم لاستخدام #البسكويت_السادة (أولكر مثلا) , لعمل بعض الوجبات , بدل السريلاك ..

#صفار_بيضة_يوميا مهم جداااااااا من بداية الشهر السادس , للوقاية من نقص فيتامين د (طبعا مع التعرض لأشعة الشمس الصبح بدرى) ..

من الأفضل إننا ما ندّيش الطفل #سكّر خلال السنة الأولى , عشان ما يكرهش طعم لبن الأم (بيكون عادب شوية عن اللبن الصناعى أو عن المأكولات اللى عليها سكر) .. بجانب إن السكر ممكن يسبب مشاكل فى الهضم عند الطفل فى السن ده .. و فيه بعض أبحاث غير مؤكدة , على ارتباط الكلام ده بحدوث مرض السكر للطفل بعد كده , لا قدر الله ..

يفضل #تبريد_الوجبة للطفل , فى حمام مية ساقعة , قبل ما نديها له , عشان فى أحيان كتير , الأم بتغفل , و تديه أول معلقة و هى سخنة , فتلسع له بقه , و ساعتها بيتعقد من الأكل , و يرفضه لفترة طويلة ..

خلال الشهور من السادس للتاسع , ممكن نضيف أكلات بسيطة ,#مضروبة_فى_الخلاط و مسلوقة , بكميات متدرجة .. زى البطاطس البيوريه , أو الجزر , أو التفاح , أو الأجزاء الناعمة من الفراخ (صدر الفرخة مثلا) , و ممكن جزء من ظهر سمكة بورى مشوية , بدون شوك طبعا 😉  .. كل الكلام ده نعوّد الطفل عليه بشكل منفصل , لمدة 3 أيام مثلا , لكل نوع , عشان نشوف لو فيه #حساسية منه ولا حاجة , لحد ما نتطمن له , و نبقى نضيفه على أكلات تانية ..

فى حالة انشغال الأم , أو عدم قدرتها على تحضير الوجبات بشكل طازج , بيتوفر فى الصيدليات , أنواع غذائية من الحاجات اللى فاتت دى , بشكل جاهز , و معقم , بدون مواد حافظة , و ممكن استخدامه خلال 24 ساعة من فتحه , لو اتحط فى التلاجة , زى #هيرو_بيبى مثلا .. و فيه أكثر من طعم , و بيكونوا كلهم محببين للأطفال جدا ..

#بعد_الشهر_التاسع , يفضّل عدم استخدام الخلاط نهائيا فى تحضير الأكلات للطفل , مع مراعاة اختيار الأكلات الناعمة جزئيا , أو اللى ما فيهاش أجزاء صلبة أو ممكن يصعب بلعها بالنسبة للطفل , و لازم نراقبه كويس فى كل وجبة , عشان مفيش حاجة تقف فى زوره لا قدر الله .. و بدل الخلاط , بنلجأ لـ#دهك_الأكل بالشوكة كويس قبل تقديمه للطفل , عشان نبدأ نعوّده على عملية#المضغ , و نحفز خروج الأسنان اللبنية فى ميعادها الطبيعى ..

قبل بداية السنة التانية , يفضل إننا نتجنب الأكلات الدهنية و الحراقة و المبهّرة أو المكسرات الناشفة ..

مع بداية الطفل فى السنة التانية من عمره , أطباء الأطفال بيقولوا إنه ممكن ياكل معظم الأكل اللى بناكله عادى خالص .. و لكن مع الرقابة برضه , عشان ما يقلبش الطبق على حجره , و يلحوس نفسه 😉  ..

بقلم : د. أحمد الجويلى

https://www.facebook.com/ahmed.elgewaily?fref=nf