العميد و الصيدلي

كتابة : أمجد رفعت

اريد ان احكى لكم ماحدث لى ليلة امس فى الصيدليه. دخل واحد من سكان الحى الذى توجد به صيدليتى وطلب 2 قرص فاروفيجا قيمتهم 5 جنيه اعطيتهم له لقيته بيقول لى هابقى ابعت لك الفلوس بعد شويه قلت له اسف ماينفعش قعد يقول لى ليه يعنى مش هاتاخر قلت له هامشى قال لى استنى ماتمشيش لما اجيبهم لك قلت له لأ وطلبت منه احضار الفلوس اولا. راح وجه بعد ربع ساعه وجايب 5 جنيه واخد القرصين ولقيته بيرمى الفلوس على الكاونتر و بيقول لى انا عميد وبأبعت العسكرى بتاعى يجيب لى اى حاجه من غير فلوس وانا هابعتلك الصيادله واعمل لك قضيه مخدرات وقعد يهدد ويتوعد قلت له عميد على نفسك ومشى وقعد يبرطم . الظريف انى دخلت لموقع وزارة الداخليه علشان اقدم شكوى لقيت النموذج موجود لكن فيه خانات مش شغاله مثلا خانه المحافظه وهى ضروريه لارسال الشكوى وماقدرتش ابعتها. من الواضح ان سياسه الداخليه زى ماهى وان كل اللى بيتقال فى وسائل الاعلام من تصريحات فهى مخدر فقط وليست الحقيقه لأن اذا كان العميد بيتصرف كده يبقى اللى تحته فى الرتب بيتصرفوا ازاى؟ واذا كان ده تصرفهم دلوقتى وفيه حكم عسكرى ولسه الشعب هايج عليهم امال هيعملوا ايه بعد كده ؟ للأسف انا كان عندى بعض الثقه والاحترام لبعض ظباط الداخليه لكن دلوقتى انتهت.