الدليل الشامل للتدريب داخل الصيدلية

على مر الأيام , تأتينى الرسايل من أصدقاء أعزاء من طلبة كليات الصيدلة على مستوى الجمهورية , و خريجين جدد كمان , عشان يسألونى عن الطريقة المثلى للتدريب داخل الصيدلية .. و فى كل مرة , كنت باجاوب بشكل يناسب الحالة اللى باتسأل عنها .. لحد ما قررت إنى أكتب النهاردة , دليل شامل يصلح لأغلب الحالات بإذن الله , و يقدّم أسس واضحة للجميع عشان تدريبهم يكون سهل و مفيد و ممتع داخل الصيدليات فى أى وقت بعون الله ..

زى ما بنقول دايما فى الحالات المشابهة لكده .. ده مش بوست عادى ممكن تقراه بسرعة , أو تمر على عناوينه بطرف عينك و تقفله , و لكنه حاجة محتاجة مزمزة على رواقة , مع كوباية الشاى بعد الفطار بإذن الله .. و عشان كده , لو مش فاضى دلوقتى , احفظه عندك بأى طريقة , و بعدين ابقى بص عليه فى وقتك المناسب .. اتفقنا ؟؟

✿ ❀ ✿ إزاى أختار الصيدلية ؟

اختيار الصيدلية مهم جدا , خاصة لو كانت دى أول صيدلية تتدرب فيها فى حياتك الدراسية , لإنها هى اللى حتسيب عندك الانطباع الأول عن المهنة , و المثل بيقول : الانطباعات الأولى تدوم , و عشان كده , حط عينيك فى وسط راسك لما تختار , لإن فيه معايير كتير , حنقول لك على أهمها فى وجهة نظرنا لما تيجى تختار الصيدلية اللى تتدرب فيها ..

★* المعيار الاول : الصيدلية

الصيدلية لازم تكون فى الأساس صيدلية , يعنى فيها كم مناسب من الأدوية و مستحضرات التجميل و الحاجات اللى أى صيدلية بتشتغل عليها ..

و لازم كمان يكون عليها ضغط شغل مناسب , عشان نشوف المرضى , و نتعامل معاهم بشكل كافى .. ما تتدربش فى صيدلية بتعمل 40 او 50 جنيه فى اليوم .. كده مش حتلاقى حالات تتدرب عليها تقريبا !!

ملحوظة / ضغط الشغل المفروض إنه يكون حى و مباشر .. يعنى فى اعتقادى , ما ينفعش تتدرب فى صيدلية , أغلب شغلها قائم على الديليفرى , لإنه مش حيكون فيه تعامل مع المريض بالشكل المرغوب , و طبعا الكلام يمتد للصيدليات اللى شغالة على تحويل الرصيد و كروت فورى !! ..

و لازم يكون فيها عمالة كافية , عشان من غير المنطقى إننا نتمرن فى صيدلية مافيهاش غيرنا , و كمان لإن تعاملنا مع المحيطين بينا داخل الصيدلية , حيكسبنا خبرة فى مهارات التعامل اللى المفروض نحصل عليها ..

★* المعيار التانى : الصيدلى

زى ما بنقول فى كورساتنا و محاضراتنا اللى بنتطرق فيها للموضوع ده , الصيدلى لازم يكون عنده 4 مواصفات

 * علم حقيقى

 * رغبة فى توصيله

 * قدرة على توصيله

 * ضمير مهنى قوى

بدون أى واحدة من المواصفات السابقة دى , و لو مش معاك مساعدات خارجية من اللى حنقول عليها كمان شوية , ممكن تتعب جدا فى تدريبك داخل الصيدلية , لإنك ممكن تواجه تناقضات كتير , تخليك تغيّر وجهة نظرك عن الصيدلة السليمة زى ما بنرجو إنها تتزرع جوه عقلك ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ أول يوم صيدلية

أول يوم صيدلية بيكون أصعب يوم فى التدريب .. لإنك بتبقى داخل مكان مش عارفه , و محتاج تبنى علاقات مع المتواجدين بسرعة , عشان تكسب ودهم , فى حين إنكم كلكم بتكونوا عارفين إن الاستفادة حتمشى فى اتجاه واحد , و هو المفروض يكون منهم إليك , .. و ده شىء حيخلق معضلة نفسية فيما بعد .. و حنناقش النقطة دى بالتفصيل بعد شوية .. و لكن اللى يهمنى فى أول يوم , هو التركيز على شوية نقط : ..

.

أولا : تحديد أولوياتك و مسئولياتك داخل الصيدلية ..

اعرف كويس من مدير الصيدلية إيه اللى ممكن يسمح لك بيه داخل الصيدلية , و إيه اللى مش حينفع إنك تمدّ إيدك عليه .. ابتداء بالتعامل مع المرضى على الـ counter , و مرورا بصرف الروشتات أو محاولة فك رموزها , و انتهاء بالتعامل المادى , و مدى صلاحية وصولك للـ cashier , أو “درج الفلوس” , عشان ما تحصلش أى مشاكل فيما بعد , نتيجة عدم تحديد الحاجات دى من البداية ..

.

ثانيا : روحك المرحة و ابتسامتك المناسبة فى أول يوم , بيتبنى عليها جزء كبير جدا من المسئولية , لإنها هى اللى بتحدد طبيعة شخصيتك قدّام المتواجدين بالصيدلية , و بترسم ملامح العلاقة بينكم حتبقى عاملة إزاى فيما بعد , فيا ريت ترسم لنفسك صورة مبتسمة دايما , و منفتحة على الحياة , و بتتعامل كويس قوى مع اللى حواليها ..

.

ثالثا : حاول ما تظهرش مهاراتك بشكل مبالغ فيه من أول يوم , لحد ما تعرف نظام الصيدلية اللى انت متواجد فيها , و سياستها مع المحيطين بيها من العملاء و المرضى و الأطباء و المعامل و خلافه .. مثلا لو اعترضت فى يوم على روشتة فيها خطأ بسيط , و قلت الكلام ده ببراءة للمريض بشكل مباشر , ممكن ده يكون نذير شؤم بالنسبة لك , لإنك ممكن تكون بكده , عارضت سياسة الصيدلية اللى دايما بتقول “سمعا و طاعة” من غير ما تناقش الطبيب فى حاجة !! .. و فى الحالة دى , ممكن سعادتك تكون غير مرحب بيك فى المكان , و الكل يعمل على تطفيشك بالذوق أو من غير الذوق كمان !! ..

.

رابعا : و على العكس بقى , ما تعملش نفسك بطّيخة !! .. حاول تكون لمّاح على قد ما تقدر , عشان تتناغم مع طبيعة الشغل و تعرف مكان التلاجة مثلا ع الأقل بسرعة … مش لازم تكون لهلوبة فى أول يوم , للدرجة اللى تخليك تعرف مكان كل علبة فى الصيدلية من أول ساعة , و لكن مكان التلاجة ممكن نعرفه قبل ما نوصل للمرة السادسة أو السابعة اللى نتسأل فيها على حاجة من التلاجة !! ..

.

خامسا : ممكن تتعرف على خفيف على نظام الصيدلية , و طريقة رصّ الادوية , و أماكن الحاجات المشهورة , بنظرة عامة و سريعة , عشان نألف المكان و نتعوّد عليه , و ما يبقاش فيه بيننا و بينه غربة لو جينا تانى يوم ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ أهم المشاكل اللى ممكن تواجهنى :

★ المدير

المفروض إنك تكون اخترت صيدلية , يكون مديرها يعرفك أو يعرف حد من قرايبك , فالدنيا ما تبقاش “قفش” من البداية بينكم .. يعنى تكون جاى له من طرف فلان , أو عم علّان , عشان يبقى فيه عشم , و يستحملك فى البداية تحديدا , قبل ما تعرف نظامه كويس ..

ده حيخليك تتجنب المشاكل المبدئية , زى العصبية و الضيق اللى ممكن يحصل لو كان المدير ما يعرفكش من البداية ..

و لتجنب المشاكل برضه , حاول تتعرف على كتالوج الدكتور المدير , من المحيطين بيه داخل الصيدلية .. انتظر لما يروح أى مشوار , و اسأل المتواجدين بهزار عن اللى يضايقه أو يبسطه داخل الصيدلية , لإن كل مدير بيبقى له “نظام التشغيل” بتاعه , و مش عيب إنك تتعرف عليه من المقربين منه ..

حتلاقى واحد مثلا , يبقى موته و سمّه الأكل جوه الصيدلية !! .. و واحد تانى لو شاف علبة مش فى مكانها يتعفرت .. و هكذا .. و كل ده , عشان ما يتلككش ليك على غلطة , و تمشى من الصيدلية , و انت بتجرّ ذيول الخيبة !! ..

★ المساعد

كتير من الصيدليات , بيكون فيها المساعد , هو “الرجل التانى” بعد صاحب الصيدلية علطول !! , لو كان هو المدير يعنى .. و أحيانا لما يكون فيه صيدلى أو صيدلانية بيشتغلوا بشكل جديد كمان !! .. هو القديم اللى فيهم و حافظ الصيدلية شبر شبر .. و عشان كده ما تستهينش بيه , و ما تفتكرش إنك داخل معاه فى صراع ديوك , و كل هدفك إنك تثبت له إنه ما دخلش كلية الصيدلة , و إنك أحسن منه عشان ظروفك سمحت بكده .. لو حصل ده – حتى لو بشكل غير مقصود – ممكن هو اللى يستقصدك , و يشقلطك بره الصيدلية فى أقرب وقت , لإن كلمته مسموعة عند الصيدلى من قبلك , و الثقة بينهم متبادلة أكتر منك , و عشان كده , حاول تكسبه من أول يوم , زى ما بتحاول تكسب المدير أو صاحب الصيدلية لو كان متواجد فى أغلب الوقت .. و الكلام ده احنا شرحناه تفصيليا فى مقال سابق بعنوان “الصيدلى و المساعد .. غرام و انتقام” .. تقدر تقراه على رواقة برضه , من هنا ..

★ المرضى

المرضى ممكن يتعاطفوا معاك كحد متدرب , و يرأفوا بحالك , و لكن أغلبهم حيكون جاى عشان مصلحته تتقضى فى أسرع وقت , و مش حيصبر عليك , و انت بتبص فى الروشتة لفترة طويلة لفك رموزها , ولا و انت واقف قدّام الدواليب بالربع ساعة , عشان تدوّر على صنفين و خايف يكونوا موجودين قدّامك و مش واخد بالك منهم !! .. كل الكلام ده ممكن يخليك تسمع كلام مش ولا بد , و عصبية مفرطة من مرضى فيهم اللى مكفّيهم أصلا .. و عشان كده , حاول ما تاخدش العصبية دى على صدرك , و عدّى على قد ما تقدر .. لإن مفيش واحد منهم يقصد يهينك لذاتك , و لكن هو ممكن يكون رخم بطبعه أو نبرة السخرية أساسية فى أسلوبه !! .. و على الجانب الآخر , خليك ذكى فى التعامل مع المريض , و اكسبه بالكلمة الحلوة (و ده اللى تقدر تجيده فى بداية تدريبك) , أو الابتسامة الحلوة (لو خرجت فى مكانها و وقتها المناسبين) , عشان يرجع لك تانى , و تبقى فيه بينكم صداقة بسيطة , تسمح لك بإنه يتأخر شوية , عشان ينتظر صرف روشتة على إيدك أو ما شابه فيما بعد ..

اسأل المريض عن حالته بالتفصيل , و اسمع منه على قد ما تقدر كل المراحل اللى مر بيها فى مشكلته اللى بيشتكى منها , .. كل ده حيخلّى عندك مخزون تطبيقى من المعلومات اللى ممكن كل المتواجدين فى الصيدلية مايكونوش أخدوا بالهم منها .. زى مثلا لما تيجى واحدة تصرف 6 حقن فورتكورتين (كورتيزون) , فلما تسألها انت على رواقة – على بال ما الروشتة تتصرف و تتحسب – عن السر وراهم , فتقول لك : الدكتور اللى حيولدنى كتبهم لى عشان البيبى .. و سواء قالت لك السر العلمى ورا كده , أو ما قالتش , حيكون دورك بقى , هو إنك تستزيد من العلم لما ترجع البيت , و تدوّر ع المعلومة و حواشيها , لحد ما تحسّ إنك لميتها من جميع جوانبها بإذن الله ..

و فيه حاجات حنقول كمان شوية تجاه المرضى برضه , بس خليك معايا ..

★ الزملاء

لو كان معاك زمايل بيتدربوا أو بيشتغلوا , فمن الطبيعى إن كل واحد يحاول يحصل على فرصة أفضل فى البقاء داخل الصيدلية .. الدنيا بقت منيّلة لدرجة إن ممكن تتفقع إسفين يطلع من نافوخك خلال أول أسبوع من تدريبك , لمجرد إن زميلك مش عاوز له منافسين داخل الصيدلية !! .. أيوة , الدنيا كده فعلا !! .. و عشان كده , حاول تكسب الكل , أو ع الأقل , تخليك فى حالك .. ما تخسرش حد فيهم قدر الإمكان , و أيا كان عددهم !! .. لإن الأيام الاولى من تدريبك , فى غاية الصعوبة عليك و عليهم … لحد ما تتعودوا على بعض !! ..

من الأفكار البسيطة اللى ممكن تكسب بيها زمايلك , هو إنك تهاديهم بحاجة تناسب جيلكم , و تكون مفيدة ليهم , يعنى لو مثلا زميلتك بتشتكى من تساقط الشعر , ممكن تدلّيها على مقالنا عن تساقط الشعر و تقصفه , أو على الـ playlist بتاعة الصيدلانى الشامى د. حسام حتك على اليوتيوب .. و بكده تبقى قدمتى لها جميل تشيله لك فى رقبتها طول عمرها , و تحاول تردّه فى أقرب وقت ..

★ أماكن الأدوية

ما تفزعش من العدد الضخم للأدوية و رصّاتها المختلفة بين كل صيدلية و التانية !! .. حتى أسماء الادوية أحيانا بتختلف على حسب حاجات كتير بتختلف بين الصيدليات .. ما تفتكرش إن الشطارة و الفهلوة , هى إنك تعرف أماكن الأدوية .. لا يا غالى .. أى حد لو تواجد فى أى صيدلية لمدة كافية , حيعرف الأماكن و يحفظها صم !! .. ما تخليش حد يفقدك الثقة بنفسك لما يطلب منك دوا معيّن و تدوّر عليه و ما تلاقيهوش بسرعة , أو ما تلاقيهوش خالص .. كل ده توتّر زائد على أكتافك , ممكن يكون غرضه تطفيشك من الصيدلية , أو تم بشكل تلقائى بسبب عصبية المتواجدين معاك .. حرّر نفسك من الحمل ده , عن طريق إنك تحدد من أول يوم , إن مش دورك إنك تحضر الدوا من ع الرفوف , عشان دورك حيكون إنك تتعرف عليه قبل ما يخرج للمريض ع الـ counter , و تبدأ تشوف كل نوع بيتصرف لإيه و إيه أهم مميزاته ..

★ حجم الشغل

عاوز نصيحتى ؟؟ .. اتدرب فى صيدليتين .. صيدلية يكون شغلها كتير , و التانية شغلها قليل .. فى الأولى حتتعامل أكتر مع المرضى , و تدوق طحنة الشغل بين الروشتات و المشاوير بين الدواليب , و تسمع المرضى و شكاويهم المختلفة , و كمان تتعوّد على أسلوبهم فى الكلام و مصطلحاتهم اللى بيقولوها و مسمّياتهم للعلاجات و الأمراض , و دى مش حاجة سهلة على فكرة فى كل بيئة بتشتغل فيها , و أحيانا بتحتاج قاموس وهمى , خبرتك هى اللى بتكتب كل صفحة من صفحاته .. أما فى الصيدلية التانية , فحتتآلف مع الدواليب و أشكال الأدوية و أصنافها , و تتغزّل فى كل علبة شوية , و تفتحها على مهلك , و تقرا البامفلت اللى جواها على رواقة , لحد ما تطلع منها بالمفيد .. و ممكن كمان تاخد معاك لابك , و تحاول تطبّق اللى بتدرسه فيه و انت قاعد كده و مقعّد حواليك باقى المتواجدين و همّا بيشربوا كوباية الشاى بتاعة العصرية !! .. حاجة فى الروقان يعنى .. عيشة و مُلك تانى ..

★ خطوط الروشتات

دى بقى مش عقدتك لوحدك .. دى عقدة أى حد بيشوف خط دكتور (منه لله) لأول مرة .. برضه ما تسمحش لنفسك تتعقد لما تشوف المساعد بيشوف الروشتة , و يصرفها كلها من أول نظرة !! .. الموضوع ده بييجى بالممارسة و التعوّد على خط طبيب معيّن , ممكن بعد كده تفقس روشتته كلها , من أول حرف بيكتبه فيها !! .. بس ده محتاج شوية وقت كافى .. تعامل مع الموضوع ببرود , من غير ما يؤثر عليك , و اقف ع الـ counter , فى انتظار وصول الروشتة كاملة قدّامك , و ابدأ اتعرف على الأدوية المصروفة بسرعة , و ربّط المعلومات اللى بتاخدها عنها – زى ما حنقول لك كمان شوية – لحد ما تكون عندك القدرة على صرف الروشتة بنفسك تدريجيا إن شاء الله ..

و عشان ما نبقاش قصرنا معاك في حاجة .. بنقدملك هنا تجميعة لأكثر من 1400 روشتة قام بتجميعها مؤرخ جروبنا د.أحمد عبد الرحمن

رابط التجميعة هنا >> https://www.facebook.com/photo.php?fbid=10204328156664523&set=oa.406991072681361&type=1

و طبعا البوست موجود على جروبنا First Pharmacology Course Online و بما إن الجروب مغلق إذن البوست مش حيظهر إلا لأعضاء الجروب فقط

لو حضرتك مش عضو في الجروب ممكن تعمل طلب اضافة و لو لم يتم اضافتك ممكن تعيد التواصل معنا بإذن الله عشان نحاول نضيفك بشكل أسرع ..

ده لينك الجروب : https://www.facebook.com/groups/1stpharmacouse/

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ إزاى أحفظ كل الأدوية ؟؟

إوووووووووووعى تسمع كلام اللى يقول لك إنك المفروض تحفظ كل الأدوية اللى فى الصيدلية , أو إنك تبدأ فى كتابتهم من ع الرفوف بالترتيب , عشان فى آخر اليوم تصحح الواجب , و الدكتور يديك فى الكشكول (صح و نجمة) !! .. اسمح لى أبشرك بإنك مش المفروض تحفظ كل الأدوية فى الصيدلية , و لكن المهم منها فــــــقــــــط .. يعنى اللى بيخرج قدّامك كتير , و له استخدام حى مع المرضى اللى بتيجى للتعامل معاكم فى الصيدلية .. و ده لإن ده اللى حتقدر تفتكره بسهولة إن شاء الله .. و يلزق جوه ذهنك , من غير مجهود مضاعف أو مضنى …

.

。 ღ˛°  لو شفت روشتة إسهال اتصرفت قدّامك و طلع فيها “أنتينال” و “محلول جفاف” مثلا , دورك بقى هو إنك تنطلق على الرف اللى فيه الأنتينال , و تبدأ فى إخراجه بالراحة و تبدأ فى التعرف عليه , و كإنك بتعمل معاه حوار صحفى , أو بتقابله فى الشارع لأول مرة !! .. معلش , انا عارف إنه ممكن يكون كلام هايف بالنسبة لك , و لكن هو كده حيثبت فى عقلك بإذن الله .. الزتونة بقى , هى إنك تربطه “كمعلومة جديدة” بـ “معلومة قديمة” كانت عندك بخصوص الإسهال , عشان التسلسل الذهنى اللى فى دماغك , يبقى أسهل عليه إنك تستحضر معلومة الأنتينال بعد كده ..

.

تحب تعرف طريقة للحفظ بـ 1,000,000 جنيه ؟؟!! .. الطريقة الإبداعية دى , اسمها الـ Holistic Learning , و قادرة – بإذن الله – على إنها تحفّظك المعلومة بشكل يخليك ما تنساهاش أبدا .. و حناخد مثال حىّ دلوقتى ..

.

احنا بنتكلم ع الـ Antinal , مش كده ؟؟!! .. لما تشوف المعلومات الأساسية عنه , ممكن تلاقى الآتى : ..

# المادة الفعالة له اسمها Nifuroxazide ..

# لا يمتص من الجهاز الهضمى نتيجة كبر حجم الجزىء الخاص بيه

# نتيجة عدم الامتصاص , فهو آمن فى الحمل و مع الأطفال

الطريقة الإبداعية تخليك تفكّر فى ربط المعلومات دى بسهولة , عن طريق إنك تفتكر إن الاسم نفسه بتاع المادة الفعالة كبييييييييير قوى .. حاجة ضخمة زى ما انت شايف .. ده يربط فى ذهنى علطول , إن الجزىء كمان ضخم زيه .. و معنى كده إنه مناسب للسيدات الحوامل .. و الدليل إن أوله “أنتي” .. يعنى موجه للجنس اللطيف أهو !! ..

و بكده عمرك ما تنسى المعلومات دى بخصوص Antinal ..

。 ღ˛°  مثال تانى عن الـ Daflon مثلا !! ..

انت عاوز تفتكر إنه بيستخدم لعلاج حالات “الدوالى” , و “ضعف الشعيرات الدموية” فى الجسم .. تمام ؟؟ .. ممكن تربطهم ببعض بطريقتين إبداعيتين ..

الأولى : Daflon  .. أولها حرف “D” .. و الدوالى برضه أولها حرف “د” .. حتى “ضعف الشعيرات” ممكن تتنطق بالانجليزى Da3f .. يعنى كلهم بيشتركوا فى البداية ..

التانية : Daflon علبته زرقاء من بره .. و الدوالى برضه بتخلّى العروق لونها أزرق تحت الجلد فى أحد مراحلها ! ..

كل ده خلّانا نربط المعلومات ببعضها بطريقة مغموس فيها الـ Fun , بشكل يخلينا ننزل الصيدلية كل يوم للتدريب , و احنا حاسّين إننا رايحين نلعب , مش نشتغل أو نتدرب .. و كل ما ننجح فى خلق روابط ممتعة زى دى بين المعلومات و بعضها , حنحبّ المجال أكتر و نتعلق بيه .. اسمحوا لى أقول لكم إن ده أحد الأسرار الخفية اللى خلتنى أحب المجال كصيدلى , و التدريس بصفة خاصة , لتأثرى بالدكاترة و المعيدين اللى كانوا بيشرحوا لنا المعلومات بالطريقة الممتعة دى .. انت دلوقتى تقدر تتعلم تطبيقها بنفسك , بدون “دشّ” و كتابة كتير ..

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ معيار نجاحى فى التدريب :

ماحدش يقدر يحكم عليك فى التدريب من حيث النجاح و الفشل بشكل دقيق إلا انت .. و زى ما بنقول دايما على النجاح إنه طريق مش غاية , فاسمح لى أبشّرك إنك بمجرد اقتناعك باللى بنقوله فى المقال ده بخصوص التدريب , و رغبتك فى النزول للصيدليات , عشان تتدرب صح , فانت كده ناجح بالفعل .. و لكن الاستمرار على كده هو الأهم .. و فى رأيى , أحد أهم المعايير فعلا هو الاستمرارية فى إنك تتواجد داخل الصيدلية , و تاخد كل يوم و لو معلومة واحدة جديدة تطلع من الصيدلية و انت فاكر إنك حصلت عليها كويس .. و أكيد حيكون فيه غيرها , و لكن حتى لو معلومة واحدة تكفينى .. معايير تانية بقى ممكن تلاحظها زى كلمة تشجيعية من المتواجدين فى الصيدلية , أو إن صاحب الصيدلية يعرض عليك إنك تشيل shift بنفسك فى مقابل أجر ! .. أو إن عدد أكبر من المرضى ييجى يسأل عليك عشان يتعامل معاك بشكل متكرر .. كل الحاجات دى حتنوّر لك الطريق بإذن الله ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ أفكار إبداعية تساعدنى

.

خلينى أتفق معاك على حاجة , تعتبر هدية بالنسبة لك بما إنك استحملت معايا و وصلت للجزء ده من المقال !! .. زمن التدريب الجميل انتهى خلاص !! .. يعنى أصبح من النادر جدا , إنك تلاقى الصيدلى اللى يرحّب بيك عشان تتدرب معاه , من غير ما يستفيد منك بأى حاجة !! .. و يعمل كده عشان خاطر المهنة و مستقبلها و الكلام الكبير ده كله !! .. ده مش تشاؤم على فكرة , و لكنها بقت طبيعة بشرية فى كتير من الخريجين الجدد تحديدا , و اللى بقوا بيشوفوا فى كل طالب فى الكلية حاليا , منافس ليهم بعد سنة أو اتنين , و ممكن يفتح جنبهم صيدلية جديدة , و يقاسمهم فى رزقهم !! .. بجانب إن حال البلد بقى يفرض طريقة التفكير دى , مع زيادة عدد الصيدليات و عدد الخريجين من كليات الصيدلة فى كل سنة !! ..

.

و لكن الحل فى القصة دى عمره ما كان إنى أتقوقع فى البيت و أرفض التدريب بحجة إنى مش حالاقى اللى يدرّبنى , و لا إنى أعمل مظاهرات و اعتصامات عشان أتدرب , ضاربا بـ نظرية الكومودينو عرض الحائط !! .. و لكن الحل فى نظرى , هو البحث عن حل بديل و إيجابى , يخلينى أقدم فائدة للصيدلية و صاحبها و المتواجدين فيها , بمجرد وجودى فيها .. و عشان كده فى الجزء ده , حاقدم لك فكرتين إبداعيتين , مش حتخسر فيهم حاجة تقريبا , و لكن بسببهم , ممكن تكون محبوب جدا فى وقت قصير داخل اى صيدلية تشتغل فيها , بالشروط اللى حنقول عليها ..

.

★*  الفكرة الأولى : حتى لو كنت عديم الخبرة تماما فى المجال , فانت ليك facebook account ع الفيسبوك , يساوى دهب , أو حتى حساب ع الـ whatsapp .. و دول ممكن تستخدمهم بشكل عبقرى كالآتى ..

.

أى مريض يدخل الصيدلية لصرف روشتة أو لوصفة OTC خاصة بيه , ممكن فى أقل من 30 ثانية , تطلب منه إنه يبعت لك message ع الـ facebook أو الـ whatsapp أو غيرهم بقى من وسائل التواصل الاجتماعى , عشان يفكرك فيها بنفسه , و مشكلته , فتبعت له انت – بعد ما تروّح فى نفس اليوم – مقال فيه نصايح بالعربى من موقع موثوق فيه , أو فيديو animation ممتع , يشرح له طبيعة مرضه باختصار .. و ده ممكن ببساطة كده , يخلّى نفس الشخص ده يدخل الصيدلية بعد كده عشان يتعامل معاك , و يسأل عليك و يشكرك على المعلومات اللى انت قدمتها له بشكل غير معتاد .. و ده يعتبر patient counseling عالى الجودة , و لكن تم أونلاين , مش وجها لوجه داخل الصيدلية ..

شوف هنا أمثلة كمان لحاجات ممكن تبعتها للمرضى , عن السمنة , و التدخين , و حب الشباب , و التغذية فى السنة الأولى , و الحساسية المزمنة , و الولادة الطبيعية و القيصرية , و الحاجات اللى بتفطر أو مش بتفطر فى رمضان , و السخونية , و ضربة الشمس , و حتى الانزلاق الغضروفى , و الصدفية , و غيرهم حاجات كتير ..

.

★*  الفكرة التانية : نفّع الصيدلية .. أيوة , باقولها لك وشّ كده .. مفيش أى غضاضة إنك كل يومين أو تلاتة تشترى للبيت عندك حاجة من لوازمه أو علاج الحاج أو الحاجّة , من الصيدلية اللى بتتدرب فيها , و مهما كانت القيمة اللى بتدفعها صغيرة فى المقابل , فده حيحسس صاحب الصيدلية بإن الولاء جواك بقى لها , مش لأى صيدلية تانية .. و ده طبعا لو شافك فى كل مرة بتعمل كده .. , لدرجة إنك ممكن توصّى جيرانك و حبايبك فى الشارع (اللى ممكن يفهموك صح , و يكون فيه بينك و بينهم عشم و أخوة) على إنهم لو احتاجوا حاجة من الصيدلية , ممكن تجيبها لهم معاك و انت جاى بعد التدريب , و تعدّيها عليهم و انت مروّح .. و ده حيخلق مودّة بينك و بين صاحب الصيدلية و المتواجدين بيها , تحديدا لو كان من النوع المادّى شوية , أو اللى بيحسبها دايما بالورقة و القلم .. و ساعتها ممكن تفرجه كمان على رسائل صيدلانية تسويقية من هنا , أو تعرض عليه فكرة الـ Health Day و تفاصيلها , و تبقى خدمته خدمة العمر !!

.

الأفكار دى و غيرها , ممكن تساعدك على إنك ما تبقاش useless داخل المكان , و عبء على كل الموجودين فيه , و عامل زحمة ع الفاضى .. و فى نفس الوقت حتخلّى الجميع يحتفى بيك , لإنك فكّرت فى إضافة benefit و شغّلت دماغك بشكل مبتكر و جديد ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ هل الفارماكولوجى مهم ؟؟

.

طبعا الفارماكولوجى مهم كمادة بتتدرس فى الكلية بعد سنة أو اتنين من دخولها , و تعتبر هى عضم الصيدلية و أساس الصيدلي العلمى , و لكن ما تسمعش كلام اللى يقولوا لك “انتظر لحد ما تدرسها عشان تتدرب” , أو “مش حتفهم حاجة قبلها” .. الكلام ده زى قلّته .. بالطرق اللى شرحناها من شوية , لربط المعلومات , ممكن تحصل على كم رهيب من المعلومات و تحفظها كويس , لحين دراستها بشكل أكاديمى فى الفارماكولوجى , بس المهم إنك تحتفظ بالكشكول الأصفر اللى بتدوّن فيه المعلومات اللى حصلت عليها قبل ما تدرس علم الفارماكولوجى , عشان تقدر ترجع لها , و تضاعف استفادتك منها بعد ما تدرسه فى الكلية , و ساعتها حتتأكد إن كل دقيقة مرت عليك فى الصيدلية كانت مهمة .. و على ذلك , فبمجرد دخولك كلية الصيدلة , فأول أجازة ليك تعتبر هى الوقت الانسب لبداية تدريبك فى الصيدلية .. مش بعد كده , أو بعد التخرج مثلا !! ..

✿ ❀ ✿ ينفع أتدرب من منازلهم ؟؟

.

اللى اتعقدوا من الصيدلية و التدريب الحى فيها , وصلوا لطرق بديلة – فى وجهة نظرهم – عشان يتدربوا بيها .. منها مثلا حضور الكورسات العلمية المكثفة مع المحاضرين الصيادلة من أمثالى و غيرهم , أو مشاهدة أشكال علب الأدوية ع النت , أو حتى تحميل روشتات و التدريب على قراءتها ع النت برضه , .. و لكن مع كامل احترامى لكل الحلول دى , هى كلها جميلة و إبداعية و أنصح بيها , إلا إنها غير كافية على الإطلاق عشان ننزل بعدها للشغل مرة واحدة بمرتّب و فى shift لوحدنا بعد التخرج !! .. لإن التدريب الحىّ بيقدم حاجات خفية بين السطور , زى طريقة التعامل مع المريض , و اكتساب الخبرة فى المواقف الواقعية و الطارئة , زى المريض العصبى , أو المريض الرخم (اللى يقول عليك بياع بامبرز !! ) , أو المريضة المحرجة , أو غيرها من المواقف الحياتية , اللى لازم نبقى شفناها Live فى تدريبنا , قبل ما نتعرض لها كمديرين صيدليات , و ممكن نغلط فيها لا قدر الله ..

.

أما لو كانت المشكلة فى نقص المعلومات عند المتواجدين فى الصيدلية , أو بخلهم بيها , أو عدم قدرتهم على توصيلها , فاسمح لى أساعدك بإنك تتواصل معانا على الاكونت الرسمي لأكاديميتنا El-Gewaily Academy على الرابط ده >> https://www.facebook.com/augacademy

, و تطلب مننا الدخول فى برنامج #91_صيدلة , و اللى بندّيك فيه عدد من المحاضرات المتتالية , و اللى بتطبّقها بسهولة داخل الصيدلية , و ترجع تتواصل معانا تانى , لحد ما تكمّل أكتر من 40 ساعة تدريبية مجانية , و كإنى قاعد معاك بنفسى أدرّبك داخل الصيدلية … و اللى جربوا معانا البرنامج , شهدوا بفعاليته بفضل الله , و لك الفرصة إنك تجرب برضه .. و إن شاء الله يفرق معاك ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ آخد المعلومة إزاى ؟؟ و أتأكد منها منين ؟؟

.

فيه مصادر كتير للحصول على المعلومة الصيدلانية , و لكن مش كلها أهل للثقة التامة عشان تاخد منها المعلومة من غير شك !! .. و عشان كده , دايما اسأل أكتر من مصدر على المعلومة اللى عاوز تتأكد منها .. و ممكن تتواصل مع الأكونت الرسمى لأكاديميتنا AUG Academy ع الخاص , و تطلب قائمة المواقع الصيدلانية الأكثر ثقة , و اللى ممكن تلاقى فيها المعلومة اللى بتدوّر عليها فى أقل وقت ممكن إن شاء الله ..

.

˙·٠•● Ƹ̵̡Ӝ̵̨̄Ʒ ●•٠·˙

✿ ❀ ✿ أهم الكتب اللى تبقى معايا

.

لو عاوز تعرف الإجابة على سؤالك ده باختصار , فممكن تبدأ حياتك التدريبية فى الصيدلية , بصحبة كتاب إمتيازولوجى , و كتاب دليل الدواء المصرى المصور , و حاول إن ما يبقاش ليك دعوة بأى كتاب عربى تانى آخره “…. ـولوجى” دى , عشان ممكن يكون تقليد فارغ من معناه و مليان غلطات لا قدر الله .. و لو حابب تعرف عن كتب أكتر و مصادر أكتر تبقى معاك , فأنا أدعوك دلوقتى , لمشاهدة لقاء الـ Gewebinar 2015 اللى تم فى بداية عام 2015 , بس ما تنساش تبقى تفوّت أول 13 دقيقة منه , قبل الاستمتاع بالمحتوى اللى قدّمناه فيه على مدار ساعتين تقريبا بفضل الله ..

.

♪♫•*¨*•.¸¸¸¸.•*¨*•♫♪

و أخيرا , بعد ما تخلّص كل الكلام اللى فات ده , فلك الحق الكامل فى إنك تتفرج على محاضرة د. أحمد الديب , عن التدريب فى الصيدلية , و اللى قدمها فى نقابة الصيادلة بالبحيرة , قبل تخرجه , على مدار ساعة تقريبا , تقدر تشاهدها من هنا .. و يا رب أكون بكده , جاوبت على أغلب أسئلتك تجاه التدريب الصيدلى فى المقال ده , و لو فيه أى أسئلة إضافية , يا ريت تشرفنا بيها ع الخاص برضه ..

و أعتذر عن إنى طوّلت عليك .. و لكن اسمح لى أدعوك لقراءة المقال من أول و جديد , مع فتح الروابط اللى بتخرج من الكلمات اللى لونها متغير عن لون المقال كله , لإنها تعتبر كنوز تدريبية برضه بالنسبة لك , و بعون الله , تضاعف استفادتك من المقال نفسه بشكل كبير ..

آه صحيح .. ما تنساش تـ share المقال لو استفدت منه حاجة .. اتفقنا ؟؟؟!!

أحبكم فى الله

أحمد الجويلى