إزاى تخلّى الفيسبوك سبب فى مضاعفة إنتاجيتك كصيدلى ؟؟

الفيسبوك هو موقع التواصل الاجتماعى الأشهر خلال وقت كتابة السطور دى .. و فى الوقت اللى كتير من آبائنا و أمهاتنا ممكن يكونوا بيعترضوا على تواجدنا عليه بكثرة , إلا إنه يعتبر منجم لخيرات متعددة , اكتشفها الغرب قبلنا , و لكن أغلبنا استخدمه فى اهيف ما يكون , بداية من لعب المزرعة السعيدة , لحد اختبارات “انظر من شاهد البروفايل الخاص بك” , مرورا بتصفح الصفحة الرئيسية لتضييع الوقت مش أكتر !! .. شىء يخلّى آباءنا و أمهاتنا معاهم حق فى نقدهم لينا بصراحة !! ..

و عشان كده , و بدافع حبى للـ social media بصفة عامة , و الـ facebook بصفة خاصة , قررت إنى أقدم لكم النهاردة مجموعة من الأفكار البسيطة التطبيقية , اللى ممكن تخليك تستفيد من الفيسبوك فى شغلك كصيدلى حر بإذن الله .. و بتعديلات بسيطة , تقدر تستفيد منه لو كان مجالك خارج الـ community pharmacy .. و ابقى طمّننا لما تجرب الأفكار دى ..

✿ ❀ ✿ أولا : اعمل صفحة خاصة بصيدليتك 

ده  هو الاستخدام الأشهر و الأقرب للذهن ..

لو كانت صيدليتك فى حى راقى , و أغلب روادها بيدخلوا ع الفيسبوك يوميا , انتهز الفرصة دى , و اعمل صفحة خاصة بالصيدلية , تديرها من الحساب الخاص بيك , و تنزّل عليها بوستات خاصة بيك , أو تكون مشيّرها من صفحات أخرى , بشكل موجّه للجمهور ببساطة , و ده يخليك – تسويقيا – قدّامهم بشكل يومى , و ده حيظهر المنتجات الجديدة اللى بقت متوفرة عندك , و كمان تقدر تنشر عليها المعلومات الصيدلانية البسيطة الموجهة للجمهور , من باب إنك تفيد رواد صيدليتك علميا بشكل عام و مبسط بإذن الله .. و ممكن برضه تستخدمها كوسيلة إعلانية عن النشاطات اللى ممكن تقدمها صيدليتك بشكل مختلف , زى لو قررت تنفّذ يوم صحى أو Health Day من تنظيم صيدليتك .. و دى من أقوى الأساليب الدعائية الجديدة , اللى بتنظمها الصيدليات باختلاف أحجامها و مناطق تواجدها ! ..

صيدليات كتير قامت بالفكرة دى , زى د. ممدوح عز فى أسيوط , و د. أحمد الوصيفى بالزقازيق , و د. عمرو زكريا فى دمنهور .. و تقدر تضغط على أسماء الصيدليات هنا , عشان تشوف الصفحات و تقارن بينها و تدرسها بشكل دقيق قبل ما تقوم بإنشاء صفحة صيدليتك الخاصة ..

♪♫•*¨*•.¸¸¸¸.•*¨*•♫♪

✿ ❀ ✿ ثانيا : خلى عملاءك أصدقاءك

البروفايل الشخصى الخاص بيك , هو المراية اللى الناس ممكن تتعرف عليك من خلالها , و يا إما يحبّوك أو يكرهوك لما يشوفوا نشاطك عليها .. لو حطيت فى دماغك إنك تكون على صلة قوية بعملاء الصيدلية عندك , اعرض عليهم إنك تكون صديق عندهم ع الفيسبوك .. و رحب بكل واحد فيهم فى بداية تواجده معاك ع الفيس كصديق .. و اهتم بالتعليق على البوستات الخاصة بيه .. ده ببساطة حيحوّلك فى نظره من مجرد صيدلى متواجد على آخر الشارع , إلى صديق مخلص و مستشار فى أغلب مشاكله الصحية اللى بيواجهها .. الفيسبوك نفسه حيعرض مشاركاتك عنده أكتر , كل ما كان التواصل بينكم باللايكات و التعليقات و الرسايل أكتر .. و فى أيام كتير , ممكن تكون فرصة قوية بالنسبة لك , لما تلاقيه كاتب ع الفيس إنه مريض مثلا , فتدخل له ع الخاص عشان تتطمن عليه .. و فى الحالة دى طبعا حيستحى إنه يجيب علاجه من حد غيرك .. و على حسب العشم اللى بينكم , اعرض عليه خدماتك اللى ممكن تقدمها من باب إنه يخف فى أسرع وقت بإذن الله ..

الخطوة دى حتضطرك إنك تتعلم إزاى تعمل Branding لنفسك بشكل مميز على الفيسبوك .. و من أفضل اللى ممكن يقوموا بالخطوة دى معاك , أ. صلاح أبو المجد , اللى حضرت له من فترة بسيطة محاضرة عن الموضوع ده , و أعجبت جدا بالمحتوى اللى قدمه فيها .. و تقدر تتواصل معاه ع الخاص , و تقول له إنك من طرفى , و هو حيقوم بالواجب إن شاء الله ..

♪♫•*¨*•.¸¸¸¸.•*¨*•♫♪

✿ ❀ ✿ ثالثا : اجمع قائمة أطبائك الموثوقين

فى كل تخصص , أكيد بتكون عارف طبيب أو اتنين , من اللى تثق فى إنك تحوّل عليهم مرضاك , اللى ممكن يسألوك فى حالات مستعصية , ما ينفعش إنك تتعامل معاها فى حدود الـ OTC اللى ارتضيتها لنفسك .. الفيسبوك ممكن يسهّل المهمة عليك و على المريض , و على الطبيب برضه , لو استأذنت من المريض و الطبيب إنك تجمعهم فى رسالة ثلاثية , تتواجد فيها كبداية , و تعرفهم فيها على بعض , بشكل يخلق نوع من الود بينهم , قبل ما المريض يتحرك من مكانه و يروح عيادة الطبيب سواء كانت بعيدة أو قريبة منه .. و من خلالها ممكن يوفّر على نفسه وقت و مجهود و مال , لما يلاقى إمكانية لإرسال الأشعات و التحاليل و الروشتات اللى صرفها قبل كده , فى نفس الرسالة , و الطبيب يبص عليها قبل ما يطلب إنه يشوفه فى العيادة فى التوقيت اللى يتفقوا عليه مع بعض .. و كل ده ممكن يتم فى تواجدك فى نفس الرسالة المجمعة .. و بكده تكون وفّرت على المريض وقته و مجهوده , و قدّمت للطبيب أكبر قدر من المرضى المناسبين لتخصصه , عشان يقدم لهم الرعاية الطبية السليمة .. و فى النهاية , الطرفين حيشيلوها لك جميلة فى رقبتهم , و حتضمن ولاءهم ليك بتكرار الموقف بشكل تلقائى بإذن الله ..

♪♫•*¨*•.¸¸¸¸.•*¨*•♫♪

✿ ❀ ✿ رابعا : ساعة على الخاص يوميا تكفيك

صديقى الصدوق نفّذ فكرة أسهل من اللى فاتت , كنت قلت له عليها من سنين , عشان يكسب ولاء عملاؤه برضه , برغم إنه مش قوى فى التعامل مع المرضى بشكل مباشر .. لإنه بيتلعثم فى الكلام , و مش بيقدر يوصّل الفكرة بسهولة للمرضى .. و دايما بيقول إن خلقه بيضيق من الكلام الكتير .. صديقى بقى ينتظر لحد نهاية التعامل مع المريض , و صرف روشتته بالكامل , و يقوم يديه رقم تليفونه , فقط عشان يدور بيه ع الفيس , و يلاقى أكونت صديقى الصيدلى بسهولة و دقة , و يبعت له رسالة يقول له فيها “أنا فلان الفلانى اللى جيتك النهاردة , عشان حالة كذا” .. فيبدأ صديقى يدوّر على Google عن أنسب النصايح اللى ممكن تتقدم بشكل مناسب لحالته .. و بعد ما يراجعها كويس للتأكد من صحتها , يقوم باعتها له ع الخاص فى رد على رسالته .. و بيتفاجئ بعد يوم أو اتنين , بنفس المريض جاى يشكره فى الصيدلية , على النصايح الفعالة اللى قراها كويس و بدأ فى تنفيذها و كانت سبب فى شفائه بشكل أسرع بإذن الله .. و طبعا ده بيكون قيمة مضافة و مميزة , بيسعى لها نفس المريض فيما بعد , و عشان كده دايما بيتعامل مع صيدلية صديقى فيما بعد .. و بكده أصبح له عملاؤه المخلصين , ..

المفاجأة الأكبر كانت بالنسبة لى , لما صديقى قال لى إن أغلب المواضيع اللى بيتم إرسالها للمرضى , بتكون من موقعنا الرسمى بفضل الله .. زى مواضيعنا عن مشاكل الشعر , السمنة , و التدخين , وحب الشباب , و التغذية فى السنة الأولى , و الحساسية المزمنة , و الولادة الطبيعية و القيصرية , و الحاجات اللى بتفطر أو مش بتفطر فى رمضان , والسخونية , و ضربة الشمس , و حتى الانزلاق الغضروفى , و كيفية التوقف عن التدخين و الصدفية , و غيرهم حاجات كتير ..

صديقى الرائع عمل شىء عظيم بمجهود بسيط .. و قدّم Patient Counseling محترف , بشكل جديد و مبدع , لما فضّى من وقته ساعة ع الفيسبوك كل مساء , للرد ع الرسايل اللى جات له من المرضى , بدل ما يشغلهم عن اللى وراهم , و يوقّفهم معاه داخل الصيدلية , بشكل مرهق أو ممل بالنسبة لهم ! ..

أصدقاء آخرين صارحونى بإن مرضاهم تعرفوا عليهم من خلال الفيسبوك , لما لقوهم عاملين share لمعلومات خطيرة و مؤثرة , كنت كتبتها على حسابى الخاص , زى خطورة حدوث نزيف أو تنقيط بعد انقطاع الدورة , أو الحرص مع استخدام حقن سنتوسينون عند الولادة الطبيعية , أو الابتعاد عن استخدام تشطيف بيتادين أثناء الحمل , أو الوصفة السهلة للقضاء على حب الشباب , أو دمامل فروة الرأس .. و غيرها من المعلومات ..

♪♫•*¨*•.¸¸¸¸.•*¨*•♫♪

✿ ❀ ✿ خامسا : اتعلم بدون ما تشعر 

من أهم المشاكل اللى بتواجه طلبة و صيادلة كتير , هو إنهم مش عارفين يتعلموا بشكل مستمر و صحيح و تطبيقى .. و شايفين إن ده ممكن ياخد وقت أو مجهود أو مال غير متواجد عندهم .. و عشان كده , كان من أسهل الطرق اللى ممكن تتعلم من خلالها , أثناء تواجدك على الفيسبوك , إنك تنضم للجروبات الصيدلانية المفيدة , زى جروب First Pharmacology Course Online , أكبر جروب صيدلانى عربى متخصص فى العالم على الفيسبوك , بعدد أعضاء يقترب من الـ 100 ألف عضو بفضل الله .. و اللى تقدر – مثلا – تنشر من خلاله الروشتة اللى بتتعرض لها , عشان تتم مناقشتها من خلال باقى الأعضاء فى وقت قصير جدا , أو تسأل على سعر منتج معيّن أو مدى تواجده فى السوق الدوائى , فتيجى لك الإجابة بإذن الله , خلال لحظات , من باقى الأعضاء اللى الجروب من خلالهم , لم يتوقف عن العمل لمدة يوم واحد من يوم ما اتنشأ من أكتر من 5 سنين و حتى الآن بفضل الله ..

و برضه فيه صفحات صيدلانية علمية متخصصة , جمّعنا لك أهمها هنا , عشان تتابعها بشكل دقيق ع الفيسبوك , و تخلي منشوراتها تظهر لك بشكل متكرر , و من خلال ظهور المعلومة قدّامك أكتر من مرة , ممكن تلاقى مستواك التطبيقى داخل الصيدلية , بقى مختلف تماما عن الأيام اللى فاتت .. و على فكرة فيه غيرها كتير … بس انت دوّر صح ..

♪♫•*¨*•.¸¸¸¸.•*¨*•♫♪

✿ ❀ ✿ سادسا : دير صفحات الصيدليات الأخرى

من أهم التجارب اللى بافخر إنى قمت بيها – بفضل الله – فى عام 2015 , هو إنى شاورت على مجال جديد , ممكن للصيادلة و طلبة الصيدلة , إنهم يخوضوه كمجال عمل إضافى , ممكن يضيف لهم خبرات فى التسويق و العمل على مواقع التواصل باحترافية .. الفكرة كانت تهدف لتحقيق تعاون بين الجراحين و الصيادلة , عن طريق إدارة صفحات متخصصة على الفيسبوك .. و لكن خلال الفترة اللى فاتت , لقيت شباب كتير , تلقّفوا الفكرة بالترحاب , مع وضع عدد من التعديلات عليها , كان من أهمها , إدارة صفحات الصيدليات اللى بيشتغلوا أو يتدربوا فيها , مش صفحات الجراحين .. و بالفعل الموضوع كبر مع عدد منهم , بمجهود بسيط , بعد ما اتعلموا أسس إدارة الصفحات على الفيسبوك , بشكل محترف فى جروبنا السرى الخاص بالتدريب على الفكرة ..

عشان تدير صفحة على الفيسبوك برضه , لازم تكون دارس كم كافى من مهارات البيع و التسويق , و اللى يقدر يفيدك فيها بإذن الله , د. وسيم ماجد .. و أسس التسويق الإلكترونى .. و اللى يقدر يفيدك فيها و د. أيمن أمين و أ. محمد الشريف و أ. شيرين بدر .. فقط تواصل معاهم , و قول لهم إنك من طرفى , و اطلب منهم المساعدة بشكل بسيط لو حابب تتعلم أسس و تطبيقات المهارات دى باحترافية ..

كل الأفكار دى , ممكن ما تطبّقهاش من الباب للطاق , قبل ما تدرس معايير نجاحها , و أهم معيار فيهم – فى نظرى – هو إن الفئة المستهدفة منها , تكون متاحة بالفعل على الفيسبوك .. يعنى ممكن ببساطة تطبع استقصاء على ورق بسيط , فيه عدد من الأسئلة اللى تقدر تحدد من خلالها , مدى تواجد عملائك على الفيسبوك بشكل متكرر ولا لأ .. و على حسب نتيجة  الاستقصاء ده , نشوف أفضل طريقة لتنفيذ الأفكار دى ..

و فى النهاية , أرجو إن المقال ده يكون بذرة لنجاحك من خلال الفيسبوك , و ما يبقاش الموقع ده وسيلة لتضييع وقتك و مجهودك , و لكن يكون محرك لشحنك بالإيجابية و الأفكار البناءة و سبب فى رزق وفير يسوقه ربنا ليك بفضله و كرمه ..

˙·٠•● Ƹ̵̡Ӝ̵̨̄Ʒ ●•٠·˙

ما تنساش لو كنت استفدت من المقال ده بحاجة , إنك تنشره عندك , و تضغط فى وقتك الفاضى , على اللينكات اللى فى وسط الكلام , عشان ممكن تستفيد منها بشدة بإذن الله ..

اتعلم صح باستمتاع

أحبكم فى الله

أحمد الجويلى

https://www.facebook.com/ahmed.elgewaily