صيادلة: سحب الأدوية منتهية الصلاحية لم يطبق.. والمستوردة والألبان بعيدة عن القائمة
رغم قرار الدكتور أحمد عماد، وزير الصحة والسكان، بإلزام كافة شركات الأدوية بقبول مرتجعات الأدوية منتهية الصلاحية خلال عام من الأسواق، إلا أن «الوطن» كشفت خلال جولتها على عدد من الصيدليات بمنطقتى «الدقى» و«بولاق الدكرور» أنه لم يتم سحب الأدوية المنتهية منها حتى الآن، وطالب بعض الصيادلة بضرورة تفعيل ذلك القرار للحد من الخسائر التى يتعرضون إليها سنوياً. أوضح مدحت سعد، 56 عاماً، صيدلى بمنطقة بولاق الدكرور، أن «سحب الأدوية منتهية الصلاحية» لم ينفذ حتى الآن، لافتاً إلى وجود أكثر من 10 أصناف فى مخزنه انتهت صلاحيتها ولا يعرف مصيرها، وتابع يقول: «أغلب الشركات مش بتاخد الأدوية اللى صلاحيتها انتهت، وفيه شركتين فقط من اللى بنتعامل معاهم هما اللى بيوافقوا إنهم ياخدوا الأدوية ولكن بنسبة معينة ولو زادت النسبة دى بتحملها أنا»، ويواصل «مدحت»: «نسبة الهالك عندى بتكون كبيرة جداً، لأنه فيه صنف الطبيب بيكتبه للمرضى وبيكون عليه سحب كبير لدرجة إنى ممكن فى اليوم الواحد أصرفه لأكتر من 4 أفراد، وبالتالى بطلب من الشركة كمية كبيرة وفى حالة انتهاء صلاحيتها بتفضل عندى وبرميها».
فيما علق «مدحت» على الأدوية المستوردة التى تنتهى صلاحيتها قائلاً: «الشهر اللى فات رميت قطرتين كل واحدة منهم بـ120 جنيه لأنها مستوردة والشركات بترفض تاخدها، ده غير إن العلاج سعره زاد الضعف، والكل بيحاول ياخد نوع بديل يكون أرخص فبيفضل عندى الأدوية اللى سعرها غالى رغم إنى مش بجيب كمية كبيرة منها». واتفق معه سامح فاروق، 35 سنة، صيدلى بمنطقة بولاق، مؤكداً ضرورة تطبيقه للحد من نسبة الخسائر التى يتعرض لها سنوياً، خاصة مع ارتفاع أسعار الأدوية فى الآونة الأخيرة: «نسبة الهالك السنة اللى فاتت فى الصيدلية عندى تخطت الـ30000 جنيه، لأن الأدوية انتهت صلاحيتها ومفيش شركات بتوافق إنها تستبدل الأدوية، وفيه شركات بتحدد نسبة من 2% إلى 6% بمعنى إنى لو أخدت أدوية بـ1000 جنيه نسبة المرتجع هتكون 50 جنيه، فده ما يجيش تمن شريط أو اتنين، وبالتالى الباقى بجمعه فى المخزن وأرميه»، ويضيف: «الأدوية المستوردة مش بترجع زى مثلاً لبن الأطفال والأنسولين وأدوية خاصة بالمناعة والأعصاب رغم إننا بندفع تمنها فورى، وده بيخلينا ما نطلبش منها كميات كبيرة ومع ذلك بتفضل لحد ما صلاحيتها تنتهى».
ويقول مكرم شاكر، صيدلى، 62 عاماً: «لا بد من سحب الأدوية المنتهية من الصيدليات، لأنه مع ارتفاع أسعار الأدوية ونقصها من السوق بقى فيه تلاعب وفيه ناس بتستغل ده وبتعمل إعادة تدوير للأدوية».
08 – April – 2017