نصائح صيدلانية للوالدة حديثا

بعد الولادة مباشرة , لازم نقول للأم شوية حاجات : …

#وزن_الطفل ممكن يخس حوالى 250 جرام خلال الأسبوع الأول بعد الولادة , لحد ما ينزل له اللبن الغنى بالبروتينات و الدهون الكافية , بعد #لبن_السرسوب المهم جدا للمناعة , و اللى بينزل من الثدى خلال الـ 3 أو 4 أيام الأولى بعد الولادة , بس بيكون شفاف شوية , و مش دسم ..

#الغيار_الكحولى على سرة الطفل بيكون مهم جدا , عشان السرة #تقع بعد فترة بسيطة .. من غير ما تتمكرب أو تتلوث لا قدر الله .. استخدام الكحول الأبيض (70%) بيكون أفضل من استخدام الكحول الأحمر , لتجنب سميّته و دخوله للدم لا قدر الله , بجانب إن استخدامه كـ سبراى بيكون أفضل من استخدامه بقطنة , لمنع تعلق القطن بمكان الجرح .. #حاجات_بسيطة_بس_بتفرق_والله ..

#قطرة_العين (توبرامايسين) أو أحد بدايلها , بتكون مهمة جدا خلال الأسبوع الاول , لعين الطفل , بالتحديد لو كانت الولادة طبيعية , لمنع وجود عدوى فى العين , تكون جات من مرور الطفل فى قناة المهبل عند الولادة ..

#لون_البراز فى الأيام الاولى بيكون أخضر غامق جدا … (بيكون اسمه Meconium) و ده من بقايا الفضلات اللى موجودة فى الجهاز الهضمى للطفل أثناء الحمل .. المفروض الام ما تتخضش لو شافته , و تبدأ ترتب نفسها إنها على إنها تشوف اللون الأصفر المعتاد لبراز الطفل , فيما بعد إن شاء الله , نتيجة انتهاء تواجد الـ Meconium ده , و هضم اللبن نفسه ..

#الماء_ممنوع بالنسبة للطفل , إلا إذا سبق غليه … و ده من باب تعقيمه مش أكتر .. و عشان كده من الممكن إن الطفل يشرب مغلى الينسون أو الكراوية أو الشمر , كمهدئات للانتفاخ ان شاء الله , بدون ضرر , طالما مصدر الأعشاب دى كويس و مضمون ..

#عينة_الكعب فى الايام الاولى و التطعيمات .. من أهم الحاجات اللى المفروض تحصل خلال الـ 5 أيام الأولى من الولادة , عشان بيتم التعرف من خلالها على عدد من الأمراض الوراثية و الجينية , بجانب قصور الغدة الدرقية .. فلازم ننتبه لكده , و نودّى الطفل لمكتب الصحة , عشان يتطعم فيه و يطلع له شهادة الميلاد

#السكر_ممنوع تحلية المشروبات الخاصة بالطفل فى الشهور الأولى بالسكر أو بالعسل أو بغيره ممنوعة , عشان ما يتعودش على حلاوة معينة , و يكره على أساسها طعم اللبن العادى , و تكون مأساة فيما بعد , عشان الطفل يرضع بسهولة زى الأول , بجانب إن السكر فى الشهور الاولى بيعمل انتفاخ شديد ..

#الرضاعة_الطبيعية مهمة جدا , و لو كان فيها صعوبة , فلازم ننصح الأم بشرب سوايل كتير جدا , مع المشروبات المعتادة فى الوقت ده , زى الحلبة و باقى مدرّات اللبن المشهورة , و لو ما جابتش نتيجة , فممكن نجرب مستحضرات عشبية , زى هيربانا و لاكتوماكس كبسول , و دى بيكون لها تأثير أقوى من الحلبة .. و لازم نقول إن عملية الرضاعة نفسها , و استمرارية المحاولة فيها , من أقوى مدرات اللبن فسيولوجيا إن شاء الله ..

#بلاش_الكيناكومب لالتهاب الحفاضات عشان خاطرنا .. عشان فيه كورتيزون , ما ينفعش يتحط لسبب هايف زى كده , فى منطقة حساسة من جلد الطفل , و الأفضل إننا نستخدم بيبى كريم , أو زيت بيبى أويل , أو كريمات مرطبة أكثر أمانا من الكيناكومب و الميكسيدرم و البوليدرم , و الكريمات القوية دى ..

#شامبو_جونسون هو أفضل الشامبوهات اللى ممكن نستخدمها لغسل شعر الطفل فى الشهور الأولى , عشان مش بيخليه يدمّع أو يعيّط كتير .. و لازم نراعى إن درجة حرارة المية المستخدمة فى الاستحمام تكون مناسبة , عشان صاحبنا ما يكرهش الاستحمام ! ..

بقلم : أحمد الجويلى

https://www.facebook.com/ahmed.elgewaily