فكر كويس قبل ما ترد على الحاج حسين

فى ظل ظروف اقتصادية عسيرة يمر بها كل مواطن
و بالطبع يمر بها الصيادلة كإحدى الشرائح فى هذا المجتمع

مما يضطر العديد منهم الى السفر خارج البلاد متحملاً بذلك مرارة الغربة و قسوتها
او ان يعمل ليل نهار من اجل فرصة محتملة فى حياة أفضل

هذه ظروف تحيط بكل المصريين و لست بصدد مناقشتها الان
ما اتحدث عنه هو ما يخص الصيادلة

مشاكل عديدة قد يكون جزء كبير منها لأسباب خارجة عن المجال الصيدلى بالمرة
****************
وسط هذا الضباب
و انت واقف فى احدى الصيدليات
ما بين كيس فوار و شريط ريفو و كبسولة كيتوفان الاصفر بتاع السنان

يدخل عليك شخص ما
تبدو عليه علامات الثراء
يعطيك روشة “شكلها يفتح النفس “

Plavix75 tab , Atacand plus tab , Prozac 20 cap

Lantus solostar, Milga tab,  Lipitor 40 tab

تقول في نفسك : الروشتة دى بعدها هقفل و أروح


تصرفها فى همة و نشاط


وتعطى المريض الارشادات بعناية فائقة


مع ابتسامة و وجه بشوش و سيل من الدعوات بالشفاء العاجل


و بعد بضعة دقائق .. تتعمق الدردشة الى تعارف
انا اسمى الحاج حسين يا دكتور
الحساب كم يا دكتور؟
940 جنية حضرتك
اتفضل “و يخرج من جيبه محفظة تعانى من سمنة مفرطة
و يعطيك خمس ورقات فئة 200 جنية جديدة براقة لامعة

فى الزيارة  المقبلة
يصرف الحاج حسين بعض الاصناف من الروشتة
و يدور حوار يؤدى الى فكرة ان الحاج حسين عاوز يفتح صيدلية باسمك


ممممممممم هفكر و أرد عليك


*******************************************
طيب تعالوا نفكر سوياً علشان نرد على الحاج حسين
دلوقتى انا و انت مطحونين ليل و نهار

فيها ايه لما يفتح صيدلية باسمى
و كمان اسجل فيها مدير
يطلعلى مبلغ شهري محترم يساعد على المعيشة


وجهة نظر برضه

طيب ايه السلبيات فى كده ……ما كده حلو اهو و زي  الفل
طيب
بعد ما فتح الحاج حسين الصيدلية باسمك
و سجلت فيها مدير

مرت كم سنة
و الحمد لله ربنا سترها من غير مشاكل مع النقابة ولا التفتيش الصيدلى


و لا مرة اتطلبت فى قسم شرطة و لا في نيابة


و حوشت قرشين من غير تعب ولا قرف


فكرت تفتح صيدلية خاصة بيك

بس المشكلة ان انت و محمد و حسن و سهام و دعاء و رامي و باسم وناس تاني كتير


عملوا نفس القصة


سواء مع الحاج حسين او المعلم ابو اليزيد
او حتى مع الطبيب البيطرى د.محمود
او مع الصيدلى احمد صاحب سلاسل الصيدليات

بالتالي مش لاقى مكان تفتح فيه علي بعد 100 متر من اقرب صيدلية مرخصة


و القرشين اللى كنت بتاخدهم من كم سنة بقوا ملاليم أصلاً
******************************

مش هنخوض في مسألة مشروعية الفلوس دي


ولا هنناقش المسألة من وجهة نظر مهنية او أخلاقية


ولا جزيئة المسؤلية الفردية المترتبة على ان نشاط يدار باسمك و تحت مسؤليتك قانوناً و انت متعرفش عنه حاجة


ولا مسألة ان قرارات و تصرفات مشابهة هي السبب فى سيطرة و نفوذ شخصيات معينة علي حساب الجميع
و رغم انف الجميع و أنف القانون و النقابة


فيها ايه لما تكتب على نفسك توكيل عام او توكيل خاص
ولا يجوز إلغاؤه الا بحضور الطرفين
و ابقى قابلنى لو الطرف التاني حضر


و لو توكيل عام ممكن يرفع بيه قضية للحراسة على النقابة


عادى ايه المشكلة يعني
******************
عمرنا ما سمعنا عن طبيب او مهندس او اي حد او اي مهنة وضعها كده


ولا عن حد بيفرط فى مهنته كده


طبعا الكلام يطول و الشرح و النقاش لا ينتهي

عموما
من باب  النصيحة


فكر كويس قبل ما ترد على الحاج حسين

********************************************

مع خالص تحياتى

د/أحمد عرابى